Yaponiya Hidrometeorologiya Agentliyinin yaydığı məlumata görə, paytaxt Tokioda avqustun 27-dən bəri hər gün yağış qeydə alınıb. "Kyodo News" agentliyinin verdiyi xəbərə görə, yaxınlaşan tayfunlar, durğun payız yağış cəbhəsi və aşağı təzyiq zolağının təsiri ilə aramsız davam edən yağışlı hava şəraiti tarixi nəticəyə səbəb olub.

Xatırladaq ki, mövzu ilə bağlı əvvəlki rekord 2019-cu il iyunun 27-si ilə iyulun 29-u arasında qeydə alınmışdı. Həmin vaxt ardıcıl 33 gün yağış yağmışdı.

Hazırkı dövrdə ən intensiv yağış sentyabrın 21-də Tokionun mərkəzində ölçülüb və 156 millimetr təşkil edib. Sentyabrın 28-ə kimi Tokionun mərkəzində ümumi yağışın miqdarı 629 millimetrə çatıb. Bu rəqəm sentyabr ayı üzrə orta yağıntı normalarından təxminən üç dəfə çoxdur.

Yaponiyanın şərq və qərb hissələri təsir altındadır

Qeyd edilir ki, sentyabrın 29-da yağış Yaponiyanın şərq və qərb hissəsini də əhatə edib.

Uzun müddətdir davam edən bu yağışın tezliklə başa çatması gözlənilmir. Hesabatlara əsasən, geniş miqyasda təsirini saxlayan payız yağış cəbhəsi səbəbindən yağışların oktyabrın 2-ə qədər xüsusilə Yaponiyanın şərq bölgəsində davam edəcəyi proqnozlaşdırılır.

Yaponiyada payız yağış cəbhəsi mövsümi hava kütlələrinin ölkə üzərində qarşılıqlı təsirə girməsi ilə əlaqədardır. Bu proses uzunmüddətli qeyri-sabit hava şəraitinə səbəb olur.