Türkiyənin ailə və sosial xidmətlər naziri Mahinur Özdemir Göktaş Prezident Rəcəb Tayyib Ərdoğanın sədrliyi ilə keçirilən Nazirlər Kabinetinin iclasından sonra jurnalistlərin suallarını cavablandırıb.
Nazir 15 yaşdan kiçik uşaqların sosial mediadan istifadəsinin tənzimlənməsi ilə bağlı suala cavab verərkən bu sahədəki qlobal təcrübələrin, xüsusilə də Avstraliyanın hazırladığı hesabatın yaxından araşdırıldığını bildirib. O, dünya praktikasındakı çatışmazlıqları nəzərə alaraq Türkiyəyə məxsus xüsusi bir model hazırladıqlarını qeyd edib. Göktaş vurğulayıb ki, sosial media ilə bağlı yeni hüquqi tənzimləmə 15 yaşdan kiçik uşaqlar üçün təhlükəsiz rəqəmsal məkanlar yaradacaq və onlara nəzarətli internet istifadəsi vərdişləri aşılayacaq. Nazirin sözlərinə görə, bu addımın əsas məqsədi azyaşlıların öz yaşlarına və inkişaf səviyyələrinə uyğun olmayan zərərli məzmunlarla rastlaşmasının qarşısını almaqdır.
