İranın IRIB telekanalının yaydığı məlumatına görə, İran İslam İnqilabı Keşikçiləri Korpusu (İİKK) Hörmüz boğazını növbəti xəbərdarlığa qədər gəmilərin hərəkəti üçün bağlayıb. Bildirilib ki, qərar iyulun 12-də icazəsiz marşrut üzrə hərəkət etməyə çalışan bir gəmiyə xəbərdarlıq atəşi açılmasından sonra qəbul edilib.

Hərbi Dəniz Qüvvələrinin rəsmi bəyanatında bildirilib ki, bölgəyə edilən istənilən xarici müdaxiləyə və boğazda gəmilər üçün "qanunsuz marşrut" yaratmaq cəhdlərinə sərt cavab veriləcək. İran İslam İnqilabı Keşikçiləri Korpusu bildirib ki, bir neçə gəmi hərəkət istiqamətini düzəltmək və təsdiq olunmuş marşrutla irəliləmək barədə xəbərdarlıqlara məhəl qoymayıb. Bəyanatda bəzi gəmilərin izləmə sistemlərini söndürərək dəniz təhlükəsizliyini təhlükəyə atdığı, bu səbəbdən qaydaları pozan bir gəminin xəbərdarlıq atəşindən sonra saxlanıldığı bildirilib.

Bəyanatda həmçinin vurğulanıb ki, ABŞ-ın bölgədəki hərbi müdaxiləsi tamamilə bitənə qədər heç bir gəminin boğazdan keçməsinə icazə verilməyəcək. İran İslam İnqilabı Keşikçiləri Korpusu ölkəyə qarşı hər hansı yeni hücum və ya sərhəd pozuntusuna dərhal cavab veriləcəyini, bu çərçivədə bölgədəki düşmən hərbi bazalarının hədəf alınacağını bəyan edib.