Türkiyə və Suriya arasında səhiyyə və tibb elmləri sahələrində əməkdaşlığa dair anlaşma memorandumu imzalanıb. Bu barədə Türkiyənin səhiyyə naziri Kamal Memişoğlu rəsmi internet səhifəsində məlumat verib. O, suriyalı həmkarı Musaab Nazzal Alali ilə keçirdiyi görüş zamanı imzalanan sazişin hər iki ölkə üçün mühüm əhəmiyyət kəsb etdiyini vurğulayıb.
Nazir K. Memişoğlunun sözlərinə görə, razılaşma çərçivəsində tərəflər səhiyyə sistemlərinin gücləndirilməsi, xüsusilə ictimai sağlamlığın qorunması, yoluxucu xəstəliklərlə mübarizə, eləcə də ana və uşaq sağlamlığı sahələrində birgə fəaliyyət göstərəcəklər. Sənədə əsasən, tərəflər əczaçılıq, tibbi cihazlar, peyvəndlərin hazırlanması, tibbi biotexnologiya, fəlakət və fövqəladə halların idarə edilməsi, həmçinin səhiyyə informasiya sistemləri və səhiyyə turizmi kimi sahələrdə məlumat və texniki təcrübə mübadiləsi aparacaqlar. Kamal Memişoğlu bu sazişin Türkiyə ilə Suriya arasında səhiyyə sahəsindəki əlaqələri daha da inkişaf etdirəcəyinə inandığını bildirərək, əməkdaşlığın hər iki ölkəyə faydalı olmasını arzulayıb.
