Amerika Birləşmiş Ştatları ordusu İranın cənubunda müəyyən hədəflərə hava hücumları həyata keçirib. ABŞ Mərkəzi Komandanlığının açıqlamasına görə, hava zərbələri raket buraxılış məntəqələrini və dəniz minalarının yerləşdirilməsində iştirak edən qayıqları hədəf alıb.
ABŞ İranın cənubunda raket buraxılış məntəqələrini və minaların yerləşdirildiyi iddia edilən qayıqları hədəf alan bir sıra zərbələr endirdiyini açıqlayıb.
CENTCOM sözçüsü kapitan Tom Havkins "Fox News"a deyib ki, ABŞ qüvvələri bu gün qüvvələrimizi İran təhdidlərindən qorumaq üçün İranın cənubunda özünümüdafiə zərbələri endirib.
Hədəflər arasında raket buraxılış məntəqələri və minaların yerləşdirməyə cəhd edən İran qayıqları da var idi. Tom Havkins əlavə edib ki, "ABŞ Mərkəzi Komandanlığı davam edən atəşkəs dövründə qüvvələrimizi müdafiə etməyə davam edərkən ehtiyatlı davranır".
Havkins hücumlar barədə əlavə məlumat verməyib, lakin İran mediası mayın 25-də səhər tezdən İranın cənubunda yerləşən Bəndər Abbas şəhərində və Sirik və Cask yaxınlığındakı ərazilərdə partlayış səsləri eşitdiyini bildirib.
İranın yarı-rəsmi "Fars" xəbər agentliyi Bəndər-Abbasdakı yerli sakinlərin bir neçə partlayış eşitdiklərini bildirib və partlayışların dəqiq yerini və mənbəyini dərhal müəyyən etməyin mümkün olmadığını əlavə edib.
Agentlik həmçinin oxşar səslərin İranın cənubunda, Körfəzlə həmsərhəd olan Sirik və Cask ətrafında eyni vaxtda eşidildiyini bildirib.
Yarı-rəsmi "Mehr" xəbər agentliyi əməliyyatlardan sonra Bəndər-Abbas liman şəhərində vəziyyətin nəzarət altına alındığını açıqlayıb.
