Türkiyə Xarici İşlər Nazirliyi Yəməndəki husilərin Mədinəyi-Münəvvərədə Məscidi-Nəbəviyə xidmət göstərən mülki infrastruktura təşkil etdiyi hücumu qınadıqlarını bildirib.
Nazirlik husilərin Səudiyyə Ərəbistanına qarşı hücumu ilə bağlı yazılı açıqlama yayıb.
Açıqlamada bildirilib: "Husilərin Mədinəyi-Münəvvərədə Məscidi-Nəbəviyə xidmət göstərən mülki infrastruktura yönəlmiş hücumunu sərt dillə qınayırıq. Səudiyyə Ərəbistanının suverenliyini və təhlükəsizliyini təhdid edən, İslam dünyasının müqəddəs dəyərlərini hədəf alan provokasiya xarakterli bu hücumlar dərhal və qeyd-şərtsiz dayandırılmalıdır".
Türkiyənin Səudiyyə Ərəbistanına olan güclü dəstəyinin bir daha təkrarlandığı açıqlamada bölgədə gərginliyi daha da artıracaq addımlardan imtina edilməsinin vacibliyi vurğulanıb.
Səudiyyə Ərəbistanının rəhbərlik etdiyi Ərəb Koalisiyası oktyabrın 1-də verdiyi açıqlamada Yəməndəki husilərin 3 gün əvvəl Səudiyyə Ərəbistanının Mədinə şəhərindəki Taybə Elektrik Stansiyasını pilotsuz uçuş aparatı (PUA) ilə hədəf aldığını bildirmişdi.
