İsrailin "Ynet" qəzetinin verdiyi məlumata görə, sentyabrın 30-da (bu gün) Dubaydan Təl-Əvivə uçan sərnişin təyyarəsində pilotlar arasında mübahisə düşüb. 174 sərnişin daşıyan hava gəmisi pilotlar arasındakı əlbəyaxa dava zamanı təyyarənin qaçırılması hallarında istifadə olunan kod işə düşüb.

Qəzetin yazdığı məlumata görə, təyyarə qalxdıqdan təxminən 90 dəqiqə sonra İordaniya hava məkanına daxil olarkən ümumi fövqəladə vəziyyətlər üçün nəzərdə tutulan beynəlxalq "7700" kodunu işə salıb. Dərhal sonra isə göyərtədə qanunsuz müdaxilə və ya qaçırılma vəziyyətini bildirən "7500" koduna keçid olunub.

Xəbərə əsasən, təxminən eyni saatlarda marşrutunu dəyişən təyyarə Səudiyyə Ərəbistanının hava məkanına daxil olaraq aşağı hündürlükdə uçmağa başlayıb. Təyyarə Səudiyyə Ərəbistanı hava məkanında ilərləyərək ölkə ərazisinə eniş edib.

Ukraynalı və rusiyalı pilotlar arasında mübahisə

İsrailin "Channel 12" televiziya kanalı daha sonra hadisənin təhlükəsizliklə bağlı olmadığını bəyan edib. Rəsmilər fövqəladə vəziyyət siqnalının pilot ilə köməkçi pilot arasındakı mübahisə zamanı səhvən aktivləşdirildiyini bildiriblər. Kanal uçuş heyətinin rusiyalı pilot və ukraynalı köməkçi pilotdan ibarət olduğunu açıqlayıb.

"Ynet"in xəbərinə görə, "FlyDubai" aviaşirkəti təyyarədə olan İsrail sərnişinlərini geri gətirmək üçün Dubaydan Səudiyyə Ərəbistanına başqa bir təyyarə göndərəcəyini İsrail rəsmilərinə bildirib.