Rusiya ordusunun Ukraynanın müxtəlif bölgələrinə qarşı son hava hücumlarında ən azı 8 dinc sakinin həyatını itirdiyi, 23 nəfərin yaralandığı bildirilib.
Ukrayna Dövlət Fövqəladə Hallar Xidmətinin (DSNS) verdiyi yazılı açıqlamada Rusiya ordusunun gecə və səhər saatlarında Ukraynaya təşkil etdiyi hava hücumları ilə bağlı məlumat paylaşılıb.
Kiyev-Odessa avtomobil yolunun pilotsuz uçuş aparatı (PUA) ilə hədəf alındığı və iki avtomobilin vurulduğu qeyd edilən açıqlamada hücum nəticəsində 2 nəfərin öldüyü, 4 nəfərin yaralandığı bildirilib.
Həmçinin ölkənin Kiyev, Xmelnitski və Xarkov bölgələrinin də bu gecə hədəf alındığı qeyd olunan açıqlamada hücumlar nəticəsində 5 nəfərin həyatını itirdiyi, 13 nəfərin yaralandığı ifadə edilib.
Ukraynanın paytaxtı Kiyevin meri Vitali Kliçko da sosial media hesabından etdiyi paylaşımda Rusiya ordusunun şəhərə hücum təşkil etdiyini açıqlayıb.
Hücumda yanacaqdoldurma məntəqəsinin vurulduğunu qeyd edən Kliçko ilkin məlumatlara görə 1 nəfərin öldüyünü, 6 nəfərin yaralandığını bildirib.
Ukrayna Ordusu Hərbi Hava Qüvvələri Komandanlığının sosial media hesabından edilən açıqlamada isə Rusiya ordusunun gecə saatlarında ölkəyə qarşı hücumlarda istifadə etdiyi müxtəlif tipli 165 PUA-dan 115-nin zərərsizləşdirildiyi bildirilib.
